紅星劈炮 舅父反枱 王祖藍捧星夢碎
2017年10月13日16:29

近年在內地爆紅的王祖藍,兩年間狂掃2億磚頭,撈到風生水起,更雄心萬丈同邵氏合組工作室,狂簽20藝人,一心諗住捧人做娛樂大亨,點知經理人公司「手工藝」開業一年,旗下藝人怨聲載道,鄧萃雯、徐子珊及黎瑞恩輪住走人。上月,就連一齊拍住打江山的副總裁舅父冼偉智亦遞信唔撈,公司四面楚歌,祖藍還要心煩老婆李亞男,婚後經常獨守空房患上抑鬱症,唔通金錢真係萬惡?祖藍明白錢搵唔晒,就算旗下藝人輪住走,眼見一手建立的娛樂王國搞唔起,王祖藍為了李亞男已經決定年底減產,陪老婆調理好身體明年努力追B要緊。

撰文:東方新地

圖片來源:新傳媒圖片庫、王祖藍微博、鍾嘉欣微博

王祖藍 捧星夢碎

去年底,祖藍同邵氏合組工作室「手工藝創作」,更一口氣簽下20藝人係威係勢,不過,公司運作一年,旗下大牌藝人卻陸續走人,已經決定唔簽約的有鄧萃雯、黎瑞恩及徐子珊。祖藍身邊人透露:「當日佢同曾志偉傾合組工作室,祖藍係好有抱負,好希望將公司搞大佢,更加掟咗幾千萬買Office,同時間不停傾藝人加盟旗下,雯女同子珊、小恩子都係佢落力傾返嚟!佢答應幫雯女接內地劇,又話開戲畀子珊,至於小恩子,就話會幫對方出碟同開演唱會,但係講咗成年,全部都冇著落,旗下的藝人就成日喺出邊同人呻,話祖藍幫佢哋唔到!唔想再嘥時間!」

去年12月,《手工藝創作》正式成立,王祖藍聯同老闆之一曾志偉及邵氏兄弟電影執行董事樂易玲,與旗下一眾藝人在四季酒店舉行出席發佈會。

近日祖藍陪亞男之餘,大部分時間宣傳《老表!畢業喇!》,女主角蔡少芬冇影,祖藍帶住公司旗下的林欣彤及細細粒陳嘉佳宣傳。

事實上,在內地拍綜藝節目起家的王祖藍,同雯女、子珊及小恩子合作年多以來,不停斟三人上內地綜藝。「雯女同子珊兩個,本身都唔易搞,佢哋覺得自己已經上咗位,唔係乜嘢都肯做,亦有好多要求,祖藍幫佢哋傾咗幾個綜藝真人騷,但係佢哋點都唔肯做,搞到大家好唔開心,內地啲製作單位好不滿,最後都係解決唔到,不停有磨擦,兩個都話要走唔留低,至於小恩子,佢根本唔恨搵錢,只係想出碟同做演唱會,對真人騷一樣冇興趣,祖藍唔想大家最後連朋友都無得做,亦放手比佢走!聽講離巢陸續有來!」

鄧萃雯同樣對綜藝節目冇興趣,同祖藍簽約年多一直意見分歧,最終決定唔留低。
王祖藍答應開戲給子珊,最終電影開唔成,徐子珊早前就透露會重返校園讀心理學兩年,決定同祖藍解約,其實簽約初期,子珊都一度妥協返內地出騷,去年十二月底,子珊就陪同祖藍夫婦及同公司的內地藝人陳子由在深圳體育館演出。
黎瑞恩自資出發燒碟得到IFPI十大銷量廣東唱片,反而同祖藍至今未有合作面世!阿媽幫口調停

藝人拉隊走,就連同祖藍一路拍住檔搵食,擔任公司副總裁的細舅父冼偉智,上月亦遞辭職信。祖藍身邊人透露:「佢舅父一路喺亞視做高層,兩人感情好好,一五年祖藍決定開公司組班,就搵咗舅父過嚟做副總裁,可以話係佢最信得過嘅親信,但自從喺內地爆紅,祖藍自信亦同樣爆棚,同舅父開始經常有分歧,近排佢哋又為咗成立演唱會部門,同一啲製作上嘅問題嘈左一輪,佢舅父覺得應該打穩陣腳先,唔好瓣瓣都話搞,但祖藍心雄點都唔肯讓步,最後傾唔掂數,舅父仲嬲到劈炮唔撈,本來祖藍媽都有出面幫口調停,但係兩個男人嘅嘢,唔係話幫就幫到。」

王祖藍非常孝順,先後買下兩個逸瓏灣物業送給阿媽同細妹,等一家人可以住得更近,方便互相照顧!今次同舅父反枱,祖藍媽亦有幫下口調停。
王祖藍同細舅父冼偉智感情要好,四年前祖藍因為信錯教友搞到寓所裝修爛尾,亦由細舅父出面解決事件,同年公司計劃開公司,細舅父亦陪著他四出睇寫字樓,可惜最終二人卻為公事反枱,舅父更辭職走人!

陪老婆返教會

公司七國咁亂,但對王祖藍更大打擊,就是老婆李亞男婚後因為老公經常唔喺身邊,因而患上抑鬱症,經常會喺屋企爆喊,今年初更加爆發埋驚恐症,身體響晒警號,令祖藍非常擔心,兩人亦被迫將生B計劃押後。知情者透露:「其實佢兩個好想有BB,但亞男有抑鬱,醫生建議佢要搞好身體先,所以祖藍先決定減產,已經唔再接內地劇,只係做綜藝節目,佢決定完成埋《奔跑吧!兄弟》第二輯,就會停一排陪亞男,自己亦可以諗下未來去向,已經計劃會去一個月旅行,等亞男可以全面放鬆心情,之後就會努力做人,希望出年可以追個BB。」早前自爆老婆患上抑鬱症的王祖藍,上周日下午,連國慶日都未有回內地開工,全日陪實老婆李亞男,可見對老婆的確非常緊張,不過當日行返教會時,祖藍就未停過襟電話!

兩人揸全新的Tesla去鯉景灣吃晚飯,入到餐廳,王祖藍比老婆話晒事點菜,自己亦放下工作,同老婆談心 !

恨生B的李亞男肚皮未有動靜,反而祖藍因為得老婆整唔少住家靚菜,養到連肚腩都長大埋!而早前鍾嘉欣同老公囡囡返港,亦有約埋好姊妹岑麗香丶王君馨、苟云慧去李亞男的逸瓏灣豪宅探對方,幾個女人圍埋整嘢食!

 

全文完

相關文章:

花弗曾國祥拖婚 黃宗澤攝位速食王敏奕

秘簽杜琪峰 劉華欽點龔慈恩女林愷鈴拍戲

秘簽杜琪峰 劉華欽點龔慈恩女林愷鈴拍戲

更多新聞