【靚景堤霸打卡位!上窰郊遊徑風光怡人!】
2018年06月13日21:46

[駐場博客 @小牛牛快樂行山郊遊相集by Chan Keung]睇到天文台預報,今個禮拜有狂風大驟雨,甚至有機會打風添,上星期襯陽光充沛,好天氣,揾返條上落坡幅小,沿途又有樹蔭嘅路線行吓先!

首先响西貢坐94號巴士到北潭涌落車,行過方北潭涌自然教育徑起步, 過咗ㄧ條小石橋轉右,就見倒ㄧ條小河,正是奥蘭治河, 聽落好似好西化,其實 又orange river翻譯過嚟,嘻嘻! 好快就經過起子灣村,靠右手面見到有鐵鏈圍住個大窿,原來就灰窰, 當年啲村民燒蠔殼來製造啲建築材料和肥料圍生, 不過時移世易,佢哋都冇繼續做啲行了。 如果想加深了解一吓上窰村啲村民,過往生活方式,可以前往上窰民俗文物館道參觀,免費㗎。再行前小小,就會見倒ㄧ個小碼頭, 海面相當之開掦, 對面就係北潭涌渡假營, 而隔離嗰座山就係太墩。如果行開山嘅山友就知道,太墩山頂影落離,成個千島湖咁樣,原來所謂千島湖就係呢度, 影完相之後繼續沿山路走, 行到入一條村莊, 草地好翠綠, 仲好開揚, 就到達黃宜州村了, 呢頭有啲廢屋, 可以進入參觀一下, 不過記得唔好破壞喔! 繼續向前行,好快就到達起子灣小碼頭, 呢度環境相當之靚, 小編見到好多人响呢度玩獨木舟, 又有人釣魚, 啲水質相當之清,仲可以見到水底好多魚仔游來游去,打過卡後, 進入山林路段 大概走多 1.5公里之後,留意返右手面有個分叉位 ,記得要細心留意,如果唔係好容易錯過咗 ,入呢條小路兩旁都係好多竹葉樹,穿過小樹林再行多大概二百呎就到達曝罟灣堤壩 ,呢度環境相當之靚,有一條好特別嘅堤霸,大約ㄧ百米長, 圍住個海通往海旁嘅另一邊, 聽聞係以前啲村民所建造的,用嚟捉魚用, 但係日久失修 ,堤壩都有部份開始決裂, 其中有三個閘口位特別窄,所以好多人行過呢度都戰戰兢兢, 呢度每逢假日都有好多人嚟釣魚 ,同埋玩獨木舟, 拍過夠後繼續走,好快就到達萬宜水庫西壩, 呢度小編兩年前已經嚟過, 今次重遊舊地 ,真係嚇咗一跳, 因為水位甚低 ,甚至有水庫中嘅建築物,底部完全暴露出嚟 ,望落去成個石礦場一樣, 仲可以走落去影下相添, 轉身望去右手邊,見到斜坡下面有一個湖,湖中有一個小亭, 呢度就係創興水上活動中心 , 入面有好多牛牛,有時間可以入去同佢哋見吓面。

由萬宜水庫西壩可以經麥理浩徑一段,行返出去北潭涌,又或者沿上窰郊遊徑 ,行返去北潭涌。 今次呢條路線,上落坡幅唔大,沿途中有樹蔭遮住,真係夏天行山郊遊好去處。

▲坐94號巴士-響北潭涌站落車跟住沿北潭涌自然教育徑起步

▲經過奧蘭治河相當之靚-原來由orange-river拼音而命名

▲經過黃宜洲村

▲起子灣碼頭風景優美

▲沿海邊路會見到幾個小沼澤有好多小紅蟹出没

▲有幾座廢屋其中一所分上下兩層外型保存尚算完整

▲路上發現ㄧ棵蒼白秤鈎楓樹

▲穿個小竹林和叢林到達曝罟灣堤霸入口

▲美麗的堤壩打卡熱㸃

▲優美的海灣假日有好多釣魚愛好者來垂釣

▲曝罟灣小堤壩因為日久失修其中有3個缺口位需要小心走過

▲堤壩路面有不小裂縫要小心

▲繼續沿上窰郊遊徑出發

▲萬宜水庫西壩旁邊就是創興水上活動中心

▲萬宜水庫西壩烈日當空前往必須要做好防曬準備

▲早排由於降雨量甚小水位已大不如前

▲由於降雨量少水庫底部都呈現出嚟情景有如行石河一樣

▲回程經過起子灣碼頭日落美景令人難忘

▲起子灣碼頭打卡熱點

▲回程時經過奧蘭治河正水退水位下降呈現美麗的倒影

上窰郊遊徑

路線: 北潭涌北潭涌自然教育徑奥蘭治河起子灣村上窰民俗文物館黄宜州村起子灣小碼頭曝罟灣堤壩上窰郊遊徑麥理浩徑1段萬宜水庫西壩創興水上活動中心 沿路折返全程來回約十公里。需時約5小時

注意:

愛護山野清潔人人有責,自己垃圾自己帶走

文字/圖片來源 :小牛牛快樂行山郊遊相集by Chan Keung

小牛牛快樂行山郊遊相集by Chan Keung

======================================================================

相關文章:

【走過九大石澗之蓮花石澗!賞野生動植物路線!】

【超靚天涯海角行山路線!鶴咀海岸保護區!】

更多新聞