【迷離但卻極刺激】郭富城精彩情史 12個疑似攻城的女星
2017年03月29日07:00

日前郭富城(Aaron)公開證實已經排期同女友方媛結婚,準備成為人夫!其實Aaron自入行以來,緋聞不斷,被傳過從甚密嘅女星一個接一個,愛情CV相當豐富!

 

1. 姚芷菁

前無綫藝員,同當時仲係Dancer嘅Aaron識於微時,但最後意見不合分手,Puppy love不了了之。

 

2. 葉蘊儀

二人拍《神鵰俠侶》時被指喺片場朝夕相對撻著,後因Aaron事業躍進成為四大天王,只好將感情事擺埋一邊。

 

3. 袁潔瑩

二人因為《武林啟示錄-風之刀》同《烈火狂奔》而成為螢幕情侶,傳出緋聞。

 

4. 陳德容

Aaron赴台灣拍《沒有你的愛》MV時同陳德容擦出愛火花,後有指Aaron多次出入女方香閨,但Aaron最後回港發展,二人聚少離多分手。

 

5. 鍾麗緹

拍攝音樂特輯《希臘之旅》讓Aaron邂逅鍾麗緹,二人不避嫌出雙入對,Aaron開騷時女方亦親身捧場,相當高調!Aaron更揚言邊個睇足十六場演唱會,就係佢生命中最重要嘅女人,可惜二人最後無疾而終。

 

6. 朱茵

朱茵喺澳洲同Aaron拍音樂特輯時出意外,事後Aaron對佢照顧有加,甚至日日親自抱佢去拍外景。

 

7. 舒淇

幾乎曾經同Aaron合作拍攝嘅女藝人,都會同Aaron傳緋聞,舒淇都唔例外。二人拍電影《風雲》時已經被傳撻著,十年後再於《全城戒備》合作時又再傳多次。

 

8. Amanda S.

又係拍MV出事!有指當年只係19歲嘅中法混血名模Amanda S.同Aaron一見鍾情,拍完MV後Aaron仲去咗女方香閨幽會,不過好快Aaron就移情別戀。

 

9. 藤原紀香

二人合拍電影《雷霆戰警》後相戀,雙方經常穿梭港日兩地密會,務求縮短long d嘅距離。翌年藤原紀香仲秘密來港為Aaron補祝30歲生日,Aaron更於女方下榻嘅酒店過夜,無奈二人從未承認戀情。

10. 李冰冰

Aaron再畋拍劇傳緋聞,對於被指同同劇女主角李冰冰戲假情真,二人均極力否認。

 

11. 熊黛林

Aaron最廣為人知又最持久嘅戀情,非熊黛林莫屬,佢哋拍拖七年,雖然從未親口認愛,但已成為公認嘅一對,不少人更直接稱呼熊黛林為「城嫂」,但最後仍於2013年分手。

 

12. 苟芸慧

有傳熊黛林之所以會同Aaron掟煲,係因為第三者苟姑娘介入,熊黛林更發表「爛桃花」言論,似乎意有所指。

 

 

視頻精選
更多新聞