新片報捷 任達華約劉嘉玲環遊世界
2018年02月26日03:00
《我的情敵女婿》台前幕後預祝該片票房邁向二千萬元。

【星島日報報道】群星拱照的英皇賀歲片《我的情敵女婿》氣勢如虹,上映10日的票房已收逾1,500萬元,前晚一眾演員,包括劉嘉玲、任達華、唐詩詠、衛詩雅與胡渭康等齊齊出席慶功宴,預祝該片票房邁向2,000萬元。

任達華前晚現身英皇賀歲片《我的情敵女婿》慶功宴,笑言:「以前我拍了很多重口味的電影,呢部係我同個女第一部一齊睇的戲,女兒於首映禮上睇到笑騎騎,更經常同我談論劇情。我好滿意票房成績,好多人問我幾時再拍第二集,使唔使再等嘉玲姐25年,我就想下年就拍,環遊世界咁去拍戲,而家環遊世界啲機票好平,八萬幾一張,可以寓工作於娛樂。」嘉玲亦笑謂:「我哋都係邊工作邊娛樂,同華哥再合作唔使等25年咁耐,20年我都好似80喇!」

此外,談到老公梁朝偉主演的《捉妖記2》口碑不及《我的情敵》,嘉玲說:「我哋呢套係香港電影,而家我成日行山途中見到唔識我嘅人,都話睇呢部戲好開心好好笑,我覺得香港人鍾意呢啲戲,佢哋套戲就比較大陸,感覺適合小朋友。我哋有香港情懷,好多香港熟悉的地方,好有情感。(偉仔曾自稱拍喜劇比你好笑?)而家證明唔係啦!但各地觀眾睇野係不同的,佢呃啲小朋友啫,但人哋都收19億票房。」

唐詩詠表示睇過《我的情敵》兩次,其中有次跟爸爸入場睇,爸爸亦睇了多部賀歲片,但始終認為《我的情敵》最好睇。問到可會跟朋友再入場睇該片?她說:「叫佢哋自己再去睇。(舊愛洪永城可有入戲院捧你場?)唔知。」詩詠坦言希望再拍賀歲片,因為覺得拍賀歲片既會帶來好運,又可以帶歡樂給觀眾。

另外,談到患大腸癌的好友林利做完手術即開工,胡渭康表示一早知悉對方的病情,而且林利還傳了醫療報告給他看,現今醫學很好,這些都係睇命水,最緊要對方的家人能夠陪伴他行康復之路。他又笑指林利叫他毋須陪伴睇醫生,否則反而變得高調。胡渭康說:「開演唱會時都叫佢唔好嚟,但佢堅持嚟,仲唱咗兩場,好擔心佢傷口爆,佢仲識同大家講笑佢割完包皮。」他大讚林利對舞台有熱誠又有義氣,亦已經康復得很好,大家不用擔心,林利將會接拍新劇。

更多新聞