【走過抗癌路】患病期間老公求婚 林淑敏:搵到一個愛錫我嘅人係成就
2019年03月01日21:00

已入行19年的林淑敏(Mandy)除咗因為喺《愛·回家之開心速遞》中飾演野蠻潑辣「大小姐」而為人熟悉,最多人知嘅就係佢抗癌嘅經過。當年Mandy確診患上第2期乳癌,慶幸男友陳中原不離不棄照顧。呢日Mandy出席時表示,原來老公當年喺佢患病期間向佢求婚,仲自爆當年結婚嘅軼事,令人覺得

編輯:Sunday Kiss|原文:東方新地|圖片:新傳媒圖片、Facebook

延伸閱讀:

【親子好去處】屯門三聖食風味足料艇仔粉

【親子好去處】期間限定!香港許願節2019@大埔林村

林淑敏:患病期間老公日日叫我嫁畀佢

Mandy喺《愛·回家之開心速遞》中飾演野蠻潑辣「大小姐」人氣高企,去年仲喺《萬千星輝頒獎典禮2018》攞到「最佳女配角」 ,好多人都戥佢開心覺得佢係實至名歸!成功背後,其實林淑敏的人生波折重重。2000年林淑敏加入TVB,一直都是演一些不起眼的角色,收入亦只僅夠糊口,至2010年確診患上第2期乳癌,治療過程令她苦不堪言。幸而有男友陳中原不離不棄照顧,Mandy經過年半治療,抗癌成功,陳中原即娶她過門。

林淑敏
林淑敏

呢日,林淑敏出席代言活動,期間播放以個人抗癌心路歷程為藍本的微電影,分享佢抗癌經過。Mandy話睇返套微電影令佢勾起不少回憶,表示當時患病時曾感徬徨,仲有向當時仲係男朋友嘅老公發脾氣,因為怕自己成為對方的負擔,想過跟男友分手。

0
0

不過,當時男友並冇畀Mandy嘅言語激退,反而仲不離不棄日日向佢求婚,Mandy最終答應:「我2011年康復,2013年結婚,當年我哋好簡單,淨係打去教堂問有冇場,教堂話有但提醒我朝早有白事,問我介唔介意,我話冇所謂。」

林淑敏
林淑敏

明白生老病死非必然

Mandy走過抗癌路,明白即使生老病死並非必然。今年2月就係Mandy同老公結婚6周年,被問到遲啲10周年時會唔會考慮特別慶祝,Mandy就話:「喺我心目中細水長流最緊要,一齊到老先最浪漫,未必個個人都可以見白頭,所以要珍惜每一天。」

林淑敏
林淑敏

林淑敏年半抗癌日子

早前林淑敏上商業一台接受主持人梁泰來訪問,電台節目大爆抗癌當中的辛酸,林淑敏由得知自己有乳癌去到做手術過程好快,「當時整個人很沉(重),但沒有好像演戲那般崩潰。整個過程是很快,由檢查、抽針、到通知,其實都只是三、四日內的事。回去聽報告,醫生就跟我說是生Cancer。他好像跟我上了一課生物課那樣,解釋我的狀況、我(患癌)的位置、我之後應該怎樣做,顧住聽這些理性的說話,我根本沒時間感性。」

林淑敏
林淑敏

一向予人巴辣的「大小姐」,現實中原來是個樂觀的抗癌勇士:「我由被通知到做手術是三日後的事,做完手術我還在家追看一套叫《三國》的劇集,看了七十幾集。然後我去看醫生,他一直在哄我說:『你可能不用打化療的』我心想:『不用打就好了』到我要打化療,我不單要打化療,我還要打標靶藥,因為我的Cancer是最惡的那種。因為我有信仰,我就祈禱,一邊祈禱我就一邊消化(這件事)。最後我就覺得要將所有治療做盡,要不然就會後悔。」

林淑敏
林淑敏
林淑敏在2010年患上乳癌,經歷過多次化療同手術切除腫瘤後,終抗癌成功。

林淑敏:化療期間他日煮五餸一湯!

幸而有男友陳中原悉心照料才可以堅強捱過:「我記得嗰陣佢唔太識煮飯,佢最拿手就係煮公仔麵,平時飲可樂食薯片。但自從佢知道我病後,每日都去街市買餸,煮飯俾我食,我每日都有5餸一湯。同埋我對癌症嘅知識好貧乏,係佢日日上網睇相關資料然後話俾我聽。」

林淑敏
林淑敏
歷時年半的抗癌日子,林淑敏當作放了一次長假,當時仍是男友的陳中原陪伴在側,無綫亦安排佢擔任《都市閒情》主持,工作時間和收入都較穩定,不用應付日以繼夜的拍劇模式。完成18次標靶針注射療程後,林淑敏宣告抗癌成功,重新投入工作。

抗癌成功老公即結婚

相比自己的堅強,林淑敏更感激老公當時沒離棄自己:「康復後,他就決定要跟我結婚。你想想,我是真的很怕,雖然我已康復,又死不去,但始終當時適逢是生育年齡,我有過這個病,未必能生小朋友,同時亦意味著我未必能給他一個健康的家庭。如果他介意,那就弊喇!」但陳中原唔介意,二人在2013年結婚,結束13年愛情長跑結為夫妻。

「找到愛錫自己的人是成就!」

林淑敏話識到呢個男人好幸福:「我做空姐嗰陣去卡啦ok,經朋友介紹認識到佢,好似猶如相睇咁,我嗰時唔知佢咁浪漫,真係要經歷先知人品係好好。我以為佢結婚之前已經好錫我,但結婚之後佢對我更加好。我可以搵到一個咁愛錫我嘅人,對我嚟講呢個真係一個成就,其他嘢都唔係。」

老公怕自己癌症復發禁生B

一對如此恩愛的夫妻,只差生兒育女便是一個美滿的家庭,林淑敏自爆想過生小孩,但沒想過老公為了自己的健康著想而反對:「其實我都有想過生小孩,但坦白說,很多生過乳癌的人,尤其是年輕女生,生理週期是比較差的,可能每二十八天都是沒有(月經)。但我沒有受影響,生理週期依然是正常,意味著我生小孩是沒問題的。但我家族遺傳荷爾蒙過高,所以我都需要吃抑制劑接受荷爾蒙治療,我吃了五年。五年後其實我可以選擇不吃然後生小孩的,我回去問老公,但他怕我因而荷爾蒙起變化,增加(癌症)復發的機會。」

林淑敏
林淑敏
7年前曾患乳癌的林淑敏,逆境重生後一直默默做好綠葉每個角色,終於畀佢等到演大小姐呢個發圍的好機會。

巴辣大小姐彈出

康復期內林淑敏堅持工作,其不撓精神令人敬佩,康復後即使被獲派的都是閒角,佢亦默默做好本份,終於等到大小姐這個令人又愛又恨的角色。獲得觀眾讚賞的林淑敏,去年更首次喺台慶頒獎禮上攞咗最佳女配角!

《愛回家之開心速遞》角色眾多,其中林淑敏(大小姐)與許家傑(送水輝)呢條感情線備受觀眾喜愛!劇中大小姐自小被父親羅樂林寵壞,角色尖酸刻薄又乞人憎,但一遇到送水輝時就含羞答答,層次豐富!

「大小姐」成就最佳女配角

2017年獲得大批網民力撐嘅「大小姐」林淑敏,竟然畀朱晨麗爆冷跑出而「撻Q」,搞到網民好嬲,仲揚言要杯葛大台!

萬千星輝頒獎典禮
萬千星輝頒獎典禮

去年「大小姐」終於眾望所歸坐正!憑《愛回家之開心速遞》攞到「最佳女配角」 。

好拍檔「送水輝」、「KC」同「Terry」,都第一時間向「大小姐」道賀!

林淑敏喺台上致謝時說:「7年前嗰場大病之後,我諗仲做得乜,樂小姐一個電話,叫我唔使擔心。」最後「大小姐」都感謝老公多年來嘅無私支持!事後林淑敏接受訪問時表示:「老公一直好支持我,好多時夜晚同我對劇本,成日扮送水輝。得獎覺得好意外同驚喜,覺得自己係唔配攞呢個獎,我只係代表《愛.回家之開心速遞》去攞。」

林淑敏拖老公出巡

大小姐成功入屋,現在行出街無人不識,不過林淑敏繼續過其低調生活。早前本刊拍得林淑敏與老公陳中原如常到佐敦返教會做崇拜,之後十指緊扣掃街醫肚。現場所見,林淑敏對老公非常溫柔,老公亦對佢非常體貼。

素顏戴上有框眼鏡的林淑敏皮膚白滑,兩夫婦打扮都以黑白為主,襯到絕。
林淑敏手機不離手,過馬路都做低頭族,好彩有個體貼老公去到邊都傍實。

林淑敏貼地掃街醫肚

劇中的大小姐非常惡死,現實中的林淑敏說話溫柔,對住老公仲會當街撒嬌。
林淑敏絕對唔係嬌生慣養,企街拮魚蛋燒賣一樣得,睇佢鯨吞生菜魚肉個樣就知佢係個不拘小節的人!

林淑敏:「出街個個都叫我大小姐」

林淑敏接受本刊訪問,提到《愛回家》的「大小姐」好出色、好受觀眾歡迎,佢首先多謝大家喜歡大小姐呢個角色,稱自己都有留意網民的留言,另外仲話依家行出街個個都叫我大小姐,佢好似變咗姓大咁!

林淑敏接受訪問期間,老公一直在旁笑笑口等候,真係一個nice guy!

林淑敏謙稱:「係個角色好啫!」

林淑敏表示得到大家認同重要過攞獎,都咗做咁多年,另外講到網民封佢為民間視後,林淑敏立即耍手擰頭,謙稱係個角色設計得好,佢只係好彩啫!希望林淑敏繼續努力,演藝事業更上一層樓!

19年來密密耕耘

林淑敏2000年參加香港小姐奪「最奪目小姐」,當年冠軍係劉蘊慧,之後便加盟無綫至今,演過無數套劇,但一直只做路人甲乙丙,2011年終憑《真相》的巴辣闊太Emily ,令觀眾留下較深刻印象。

當年入無綫做小花,與黃紀塋、汪琳及宋之齡同期。
《都市閒情》
《是咁的,法官閣下》

林淑敏活在當下

林淑敏之前接受本刊專訪分享抗癌經過,講到呢個病令佢脫胎換骨,她笑言:「其實係祝福嚟,好多人會覺得,病一定好慘、一定係唔好,但我有呢個困難面對過,我又覺得一路行落嚟,其實所有嘢對我嚟講都係祝福、成長,我嘅性格改變咗好多,以前係好憂慮,好似好識計劃咁,會計劃到六十歲、七十歲,但係今日嘅我,我會比較傾向活喺當下,我會顧好今日、明日,將來嘅事,船到橋頭就自然直㗎嘞。我少咗好多憂慮,我覺得我諗咁多,一來未必會發生,再講我都未必會有六十歲、七十歲,唔知㗎嘛!個人豁咗出去,輕鬆好多、開心好多,演戲其實都係內心嘅反射,當我放輕鬆咗,其實對我自己嘅演技係有一啲幫助。」

林淑敏
林淑敏
林淑敏憶述:「當時我屋企人唔知我生cancer,去到打第三針,我媽咪返嚟香港,我冇辦法瞞至講,我好驚佢唔開心,但原來諗埋佢嗰份係好戇居,我媽咪知道後話:『哦,你講咁耐,你想講你生cancer呀!你一定要醫喎,阿邊個就係堅持唔打化療,走得好辛苦,你一定要打呀!』」

問到林淑敏當初係點發現患乳癌?佢話:「我自己摸到㗎!乳癌有好多係深藏喺裡面,去到有徵兆被發現可能已經處於好危險嘅階段,我都算係好好彩,我嘅腫瘤係生喺表皮下面,凸起咗,唔去理都唔得,去睇醫生,好快做咗個決定,做手術,因為係表皮下,唔需要做全乳切除,但就要剪皮,剪走感染嘅皮。」

林淑敏
林淑敏
講到飲食方面嘅改變,林淑敏話:「我淨係有兩樣嘢唔得,唔食過甜嘅嘢,控制一日攝取大概六粒糖。六粒糖來自水果、飯、五穀,甜品、精製過嘅嘢我唔食,油炸嘅嘢我唔食,烤過嘅皮、動物油脂我唔食。另外莓類、抗氧化嘅嘢我會食多啲,但試過抗氧化嘅嘢食太多,血小板過低,咁我咪又食番少啲。依家我每日食兩個拳頭份量嘅連皮水果。」

確診後三日做手術

同樣成功抗癌嘅薛芷倫話佢冇喊過一次,淨係知道要全力以赴去戰勝癌病,問林淑敏當時嘅心態又係點?佢答:「我有喊㗎,我係人嚟,哈哈哈哈!我唔係話薛芷倫唔係人,我相信每個人嘅處理方法都唔同。嗰時我仲開緊工,要同當時套劇嘅監製講,因為無啦啦失場人哋都要知咩事,對住佢又喊咗一餐,對住男朋友又喊咗一餐。但好快就消化咗件事,因為確診後,醫生第二句就同我講:『你唔使死嘅,你只係需要接受一個好長嘅治療啫!』我知道自己唔使死,再唔開心落去,我都係要繼續生活。確診之後三日就做手術,快到都冇時間諗。」問林淑敏當時要做電療同化療?佢表示:「要!需要做化療,打標靶藥同電療。電療就一個月,化療就四針、三個月,標靶十八針,啱啱一年,成個療程差唔多年半。過程冇想像中咁痛苦,我所經歷嘅副作用唔多,化療會嘔、會爛口,喺我身上都冇發生過,甚至乎我有能力做運動,甚至標靶藥未打哂我已經返番工。」

林淑敏
林淑敏

林淑敏又指自己原本冇諗過要結婚:「做完曬療程,再抖咗幾個月,有一日佢同我講:『你其實有冇諗過結婚㗎?』我答:『老實講,冇喎!』跟住佢話:『有冇搞錯!咁幾時結?你講嘞!結唔結?你講!』咁都已經唔係求婚啦,哈哈哈,我話:『要結咪結囉,咁結囉!』就係咁嘞,大家好似開咗個會咁。」

林淑敏
林淑敏

老公拒冒險生B

講到林淑敏依家41歲,其實都趕得切生小朋友,但佢話:「唔得嘞,我有雌激素過高,要食荷爾蒙藥,原本係五年一個療程,上年食完五年,醫生同我講:『你諗唔諗住繼續食第二個療程?如果你要生小朋友,你就要快嘞,依家就要停藥嘞,半年之後你可以準備生小朋友。』但依家醫學上整個荷爾蒙療程一睇係睇十年,我諗唔掂,我就返去同我老公講,問佢繼續食藥定生小朋友好,我老公就話:『唔好生,女人大肚雌激素好高㗎,好危險,我唔想要一個我唔識嘅仔,而令到你有危險。』好感動佢幫我做咗呢個決定。」

林淑敏選港姐為做幕後

在訪問中問到「大小姐」個角色咁有霸氣,觀眾喺街見到林淑敏時係驚定興奮?林淑敏笑言:「佢哋開心㗎,佢哋會捉住我嚟玩,叫我扮番『大小姐』個樣,問我『可唔可以擺番大小姐個樣派利是、可唔可以當出警告信畀我?』哈哈!我係enjoy嘅,佢哋睇得開心,我覺得係最大滿足感。」講到林淑敏係港姐出身,佢話最初參選係因為搵唔到嘢做:「我大學讀電影,返到嚟搵唔到相關嘅行業,就去咗做空姐,做咗半年之後我都想試下做自己讀嘅嘢,但冇門路,我喺無綫見咗兩次PA都冇請我,跟住咪選港姐,嗰時都懵懵哋,幾時決賽都唔知,唔知發生咩事。」

林淑敏
林淑敏

曾攞最奪目小姐

問佢落選有冇唔開心?林淑敏表示:「太耐嘞,我好似係清朝、古代嗰啲港姐(2000年參選),太多年嘞,我已經冇咗嗰種感覺,初選嘅時候,我攞咗個『網上最奪目小姐』獎,到後來雖然冇入三甲,但係三甲要做嘅活動,植樹、鏟泥、社會服務我全部要去做,嗰年嘅週末其實都幾忙。」

林淑敏
林淑敏
人氣提升,吸金力亦上升,林淑敏直言:「夠食啦,比夠食好少少!哈哈哈哈!」

林淑敏又指自己最初冇簽藝員合約:「我覺得我讀嘅係電影,都想試下做幕後嘅經驗,就去咗製作公司做幕後,拍旅遊、政治特輯,做咗差唔多年半,開始慢慢式微,嗰時有個機會簽番畀TVB,02年10月就簽番畀TVB。」

讚公司有人情味

問林淑敏演出近年先有人留意,期間有冇諗過放棄?經濟上係咪OK?佢答:「我就好現實嘅,我覺得打份工囉,工作唔一定順利㗎嘛,當中有好多角色我好鍾意,但我鍾意又唔代表觀眾會好認同,但我其實攞到個滿足感,當然十幾年裡面,梗係有捱過、行過一啲困難嘅路,有試過收入唔夠,係會驚、會徬徨嘅,有段時間我自己都諗不如算啦、唔做嘞,都有試嚇做其他嘢嘅,但係六年前有個病,呢間公司好好、好有人情味,同我講不如簽番入嚟做啲簡單啲、輕鬆啲嘅工作,如果真係覺得辛苦,咪停咗佢、繼續休息,我覺得又試嚇啦!」

林淑敏感慨表示:「我喺病之前同之後嘅心態好唔同,病之前嘅心態係覺得個人磨到係打份工啦、出份糧啦,但6年前因為個大病學識珍惜,珍惜自己嘅工作,珍惜自己嘅生命,想每一樣嘢都做好佢。開始重新去pick up,pick up自己嘅諗法、態度,pick up自己做戲,我係演員,我需要pick up我演戲嘅技巧,一路再做上去。」

賤人、妓女都要做

講到病完之後演技去到另一個層次,林淑敏表示:「其實我做戲唔好,只不過我好彩,遇到個角色係自己理解到。演員好被動,角色嚟到就要做,賤人、妓女、八婆都要做。但要喺入面加入自己嘅嘢。今次大小姐呢個角色好有character,好立體好有人性,呢個角色邊個做,效果都唔會太差,我真係好彩!」

林淑敏
林淑敏
林淑敏曾失落「女配」獎,但演技被網民認同。

延伸閱讀:

【親子好去處】銅鑼灣全新一站式室內遊樂場

更多新聞