佘詩曼爆曾為事業放棄愛情 「超級鐘意至會結婚!」
2019年03月17日11:00

佘詩曼去年憑內地劇《延禧攻略》演出再度爆紅為港星增光,早於娘家無綫已被公認演技超班的她,大談演技摸索期、事業的樽頸 ;又分享閒時喜好、擇偶要求,以至愛情觀等!

撰文:東方新地|圖片:東方新地、佘詩曼微博

延伸閱讀:

結婚26年仲咁sweet!江華、麥潔文搭住膊頭行超市

囝囝滿月!鄭嘉穎晒全家福 Rafael似足爸爸

佘詩曼最近做緊咩?

最近佘詩曼拍緊一套三、四十年代嘅網劇,今次唔係演奸角,而係劇中做一個黃曉明嘅好老婆。阿佘表示:「壓力係喺自己會唔會做到之前咁好,因為上一部《 延禧攻略 》係起伏好大嘅角色,可能人嘅感覺亦都會好唔同、好新鮮,但係今次因為純粹係 一個家庭主婦、一個平凡嘅人,可能又會有第種味道嘅。」

入行經過

由入行選港姐講起,阿余話:「因為其實我由識聽人講嘢嗰時開始,已經叫我去選港姐㗎嘞,講咗幾十年,跟住讀完書畢業,嗰時農曆年酒店業 唔請人,喺度等,等到電視又響起選港姐嘅廣告音樂,媽咪又叫我選。」

「嗰年好勁,我呢啲行埋一邊,所以一宣布季軍都已 經好開心。」,被問到當日奪季軍,但反而係三甲中(冠亞軍翁嘉穗、李明慧 )發展最好,阿佘話:「佢哋搵到佢哋嘅幸福家庭,我又搵到我自己鍾意嘅工作,我諗大家都好開心!」

開始演戲

「未卸任就去試鏡,以前喺學校,我都無玩咩Drama Club,初初接觸演戲,同埋全部都係陌生人,好驚,好細 聲就變咗雞仔聲,都有受過打擊㗎!」,至於問到走紅後有冇變囂,佢就笑言:「我諗我無,同埋我唔覺得係有幾叻囉!叻仲有好叻,你演得好,仲有好多人演得好好,你今次演得好,下次可能演得唔係好好, 永遠都無最好。」,相當謙虛。

歷年嚟,阿佘演出無數。

「攞完第一次雙料視后嗰時,因為之前一路都向住嗰個目標進發,咁多年唔得,喺好失望嘅時候,突然間畀你攞晒兩個, 當刻梗係好開心啦,但過咗我諗半年度,唔知再做咩,個人完全好空。跟住同好多前輩傾偈,佢哋話:『呢個係一個過程嚟嘅啫,當你 遇到下一個你鍾意嘅戲嘅時候,你咩都唔記得晒㗎嘞!』事實上又係!」,奪雙料視后竟成事業樽頸位!

06年憑《鳳凰四重奏》一人分飾四角精湛演出首獲無綫雙料視后,2014年憑 《使徒行者》再次奪得無綫雙料視后及華鼎獎視后殊榮。

離開無綫

阿佘今時今日睇返視后獎,佢坦言:「係對自己一個交代,觀眾嘅認同當然要,辛苦咗咁耐,都希望可以有番啲成績。嗰時拍到自己都覺得有啲悶,因為成個舊公司嘅同事、對手基本上差唔多合作過晒,我就驚觀眾會悶,咁不如試吓走啦,同吓啲唔同嘅對手或者團隊合作」。

「初頭啱啱出嚟嘅時候,可能冇乜人知 點 contact 我,變咗有一段時間無咁忙嘅,但係喺嗰段時間入面,又可以做到第啲嘢,所以好多嘢都有得有失嘅,後尾自組工作室,接咗個真人騷,所以咪煮餸,我都唔知,我自己都𢱑晒頭。」,多個發展方向對藝人嚟講都係件好事。

內地競爭大

問到點得到嫻妃一角,阿佘表示:「好耐、好耐以前同于正(《延禧攻略》製作人)合作過,佢最初係編劇,佢第一部編劇嘅內地劇集係搵我拍,所以認識 咗,中間佢都搵過我合作,但我喺香港拍足365日、都無時間拍,直到佢睇完《金枝慾孽》(2004年)好鍾意,又過咗十年八 年,佢又搵我,就係咁」。

提起該角,阿佘透露:「因為我個角色係好沉,成日都要諗計,又要借刀殺人,唔需要咁急,其實可以慢條斯理,因應角色需要啦!」,所以原來演繹方法都有唔同,諗吓先再去講對白,係刻意嘅。

對於嫻妃呢個角色有咩體會,阿余指:「咁多年嚟,無真真正正演過一個比較奸嘅角色,因為以前電視台係好保護,直頭有少少下咗 令「 唔好畀佢演奸角 」,但我自己睇好多,睇好多 之後會諗如果我係佢我會咁演,我諗好多、諗咗 好多年,終於畀我遇到一個,可以發揮出嚟。我好矛盾,又驚人唔鍾意我,但其實又開心可以試,我用我咁多年累積嘅方法去演會點呢?」,想太多不如試一試。

開始續漸減產

「華鼎獎 」視后都攞埋,阿佘就直言:「一路減產咗好多,我以前一年拍120集,依家一年都係拍幾十集。我覺得依家攞獎好似愈嚟愈難,因為依家攞嘅獎都係喺內地為主,內地嘅市場競爭真係好大,同埋佢哋真係好多人,攞獎唔係咁容易嘅事,我好珍惜!」

從無keep fit

講到keep fit,阿佘好認真咁講:「我真係無 keep 㗎,我咩都食嘅,我又 夜瞓,又食宵夜,又食煎炸嘢。我唔鍾意做運動,但真係去唔到, 可能我未同運動產生緣份住。不過,譬如我昨晚知道今日條裙好緊,咁我昨晚咪食少啲嘢,唔裝飯囉!」,都係有秘訣嘅。

唔排除閃婚

感情方面,阿佘話隨緣,「我係生活得好開心嘅,我唔會為咗結婚而結婚囉,我一定係鍾意嗰個人,係超級 鍾意,我先至會同佢結婚。你話咁多年係咪無拍拖?梗 係唔係啦,但我覺得如果唔係真嘅又唔需要講出嚟 囉,喺事業上我已經係透明度好高,喺愛情方面我希望 留番少少空間同埋小秘密畀自己。」

「屋企人有無畀壓力,同埋我覺得愛情好難講㗎喎,愛情好神奇,如果遇到一個真係好鍾意嘅人嘅時候,又覺得啱時候嘅,咁我係好鍾意小朋友,好鍾意好鍾意,我諗唔好未學行先學走囉,呢樣嘢有對象先諗啦!」

擇偶條件

至於鐘意咩類型男生,阿佘話:「我諗係一個叻嘅人,我鍾意叻嘅人,叻嘅人就有charm。擺咗咁多時間喺工作上,亦都當其時最花樣年華嘅時候,我係選擇咗事業,我事實上係有因為事業放棄過愛情,我又唔會後悔,我就係鍾意我 嘅工作、就係鍾意演戲,我相信愛情嘅,我亦都覺得我會遇到一個我真係鍾意嘅人,但係我又唔會強求,因為佢要嚟就嚟㗎啦!」,同樣隨緣。

對於處理新聞同緋聞,阿佘坦言:「媽咪成日都教我「 不招人妒是庸才 」同埋「 樹大招風 」,媽咪話:『你唔紅就無人講你啦!』我覺得係天嘅安排,畀我一個好好嘅 training 去令到我嘅 EQ 高,同埋喺咁多年裡面,我會識得體諒吓人哋,即係人哋(傳媒)都要返工啫,可能要搵啲juicy啲嘅新聞嚟出書,諗到自己都好阿 Q 精神,咁咪開心啲囉!」,非常體諒傳媒工作者!

睇好李佳芯

問到阿佘有冇睇好邊一位新一代演員,佢就立即話:「我鍾意李佳芯,我都係貼佢(指視后)嘅,又靚女!《BB來了》,我唔係睇晒,睇咗啲。」,相信Ali都好開心聽到阿佘咁講!

延伸閱讀:

盤點過往12位捲入醜聞男韓星 吸毒、性醜聞樣樣齊!

更多新聞