【專訪】泳兒《明日花》訴說得不到更美好 自爆從未試過主動表白
2019年04月03日10:53

近來泳兒推出的新歌《明日花》以花喻人生,不過一聽就令人想起張敬軒的《櫻花樹下》最後一句「明日花,昨日已開」,泳兒直言自己覺得與《櫻花樹下》有點關係,因此亦問過填詞人林若寧(Riley):「不過答案係一個謎!佢冇直接答我有冇關係,其實呢隻歌係講有啲嘢應該由佢留在想像空間,會比實現佢更好。係描述已經錯過咗的事物。」

問到最喜歡的歌詞,泳兒就表示是「從來沒關係不想我的位置」,她認為這句應該都說中了不少人的心事:「成日話唔介意,但心入面其實好介意,只是不敢說出來。」另一句喜歡的就是歌曲最尾「明白曇花早死無用空歡喜」,泳兒:「其實有時好多慾望,你得到之後未必是想像中的美好,所以得不到亦不需要太強求,可能留在腦海會是最美好!」

這首歌描述暗戀的感覺,問到泳兒有沒有暗戀經歷,她坦言讀書時期有不過結果當然是無疾而終,她更自爆人生中從未試過和心儀對象表白:「可能思想好傳統,覺得要男仔追女仔。如果女追男,N年後可能會被人講當年係你追我!不過依家慢慢改變了想法,男仔都會中意被女仔追,女仔做主動亦沒問題。」

《明日花》MV中的眼妝好特別,泳兒直言希望帶給大家大對比的感覺:「其實我內心都中意好暗黑嘅嘢,今次造型我都好中意,好襯首歌!今次我都主動要求加咗現代舞落MV,因為呢首歌唔需要用故事去講,反而用肢體動作會更易令大家感受到!」

今次曲調與過往很不一樣,泳兒表示自己本身收到歌曲時其實是國語歌:「所以聽落唔係太廣東歌的味道,加上編曲比較少喺我嘅情歌入面出現。唔係普通港式K歌。」泳兒直言自己好喜歡《明日花》的Music Intro:「好怪嘅,冇聽過一隻情歌嘅前面會有咁嘅感覺。」

更多新聞