關智斌已聯絡Steven:佢要自己面對
2019年07月29日03:00
Kenny前晚返港,對演唱會被擱置表示無奈及無辜。

【星島日報報道】組合BOYZ的關智斌(Kenny)和張致恒(Steven)再次合體,原本於九月在紅館開騷,不過Steven日前宣布結婚兼榮升爸爸後,卻被踢爆一腳踏五船,形象直線插水,就連BOYZ演唱會亦大受影響而擱置,搞到拍檔Kenny無辜受連累。

Kenny和Steve早前為演唱會出發到泰國布吉拍攝宣傳片,但Steven被爆出桃色醜聞後突然離開,就連Kenny亦無法聯絡對方。Kenny前晚返抵香港機場時,表示Steven有聯絡他,亦解釋為何中途離開。談到演唱會擱置,他表示只可以說無辜和無奈,希望上天給予第二個安排。

提到有網民建議他與張敬軒開個唱,他說:「哈哈!我昨晚都唔識笑,平時都會覺得幾好笑。(Steven被指一腳踏五船。)聽到都有點驚訝,但平時我們大多講無聊事,佢嘅事留番佢自己講,佢要自己面對,負番應有責任。(Steven有否問你借錢?)我同佢不嬲無乜計,有時佢借畀我,有時我借畀佢。(會否叫佢還錢?)咁多年,無計呢啲。」續問可覺Steven跟歌曲《死性不改》很相似?他搲頭稱不懂回答。而現場見Kenny神色憔悴,他則解釋是由於舟車勞頓所致。

另一邊廂,蔡卓妍(阿Sa)跟BOYZ相識多年、份屬好友,未知是不滿Steven的行為、還是替Kenny不值,已在社交網站怒刪Steven的關注。

更多新聞