【肌肉大叔】黃德斌玩日系祭典運動灑汗水:拍戲以外嘅時間會去做gym

2021年07月16日12:33

最近人氣急升的型男黃德斌,日前於昂坪巿集出席昂坪360運動祭揭幕禮。活動期間,德斌暢談了多年來一直經常做運動的習慣及心得,成功長期保持完美身形,以最佳狀態拍攝型男角色。他以一身肌肉與現場來賓一同揮灑汗水,即席表演劍球自創招式。德斌表示,演藝界、運動界及旅遊業界均受到疫情打擊,今次活動集合了三個界別互相打氣鼓勵,可謂別具意義,所以一拍即合。而且他更透露早前為活動拍攝宣傳片,推動活動背後理念「讓每滴汗更有價值」,展示他對香港運動員的鼎力支持。

德斌早前與籃球女神方泳琳Jessie及一眾本地世界級運動員為「360 Sweatival」運動祭拍攝宣傳片,片段內提及運動員於疫情下訓練及比賽被迫叫停時,所面對的心路歷程。近年來熱衷於鍛鍊以及野外競賽的德斌,深明箇中感覺:「我明白比賽對於運動員嚟講係非常重要,因為除咗可以展現一直努力嘅成果外,呢個亦係證明自己能力的機會!縱使疫情之下,本來定期舉辦嘅大大小小比賽要延期或者取消,打亂晒佢哋嘅練習節奏,但慶幸大型賽事可以繼續舉行,等運動員喺國際大舞台展示實力,實現夢想!喺度希望每位運動員、尤其係香港運動員,都可以發揮佢哋應有嘅水平,拎到好成績,讓每滴汗更有價值。」

德斌笑言自己未能與專業運動員同日而語,但也曾參加過22公里越野跑比賽,或多或少都明白比賽對運動鍛鍊的重要:「我平時拍劇同拍戲以外嘅時間,會去健身室做gym。在2019年參加過22公里越野賽,當時我跑得比大家慢好多,原因係我上半身嘅肌肉量唔足夠。若要應付全身協調嘅運動,好似野外行山咁,就需要接受訓練,加強鍛練體能。當時我用咗兩個月跟教練操練,最後成功完成賽事,覺得非常滿足!雖然我嘅訓練強度一定冇專業運動員咁高咁嚴格,但我已經體會到運動員嘅堅毅,係幾咁重要!今日我見到昂坪呢度啲山咁靚,都想搵日行下,或者下次搭一程纜車,另一程就試下挑戰昂坪棧道!」

德斌:「今次活動融合咗日本運動元素,我有玩過劍球,覺得好有趣。唔好睇佢好似好易玩咁,其實大有學問!初時覺得好簡單,以為任何年齡層都可以玩,但原來拎上手就發現唔簡單,試咗好多次都係差少少、差少少先得!我知今日有劍球運動員喺度,仲拎過世界排名第14,真係想請教一下佢,學返一招半式過下癮!」

視頻精選
更多新聞