Supper Moment聖誕開騷 家人粉絲同場過節

2021年12月21日03:00
■Supper Moment四子首度踏正在聖誕開騷。

【星島日報報道】

  《Supper Moment Everything In The Box》三場演唱會將於聖誕節舉行,這是樂隊Supper Moment首度在聖誕佳節開騷,他們已預備帶同家人到場齊齊歡聚;而第一次到西九自由空間開騷,他們認為跟粉絲距離更近,加上今次製作有很多新構思,應該會帶給歌迷一個難忘又驚喜的聖誕節。

Supper Moment 繼今年6月舉行一連兩場的《一直相信演唱會》後,相隔半年再開騷,他們認為場地較細反而有利跟歌迷交流,「今次想用超近距離同歌迷一齊過聖誕。真係好耐好耐未試過,唱咁近距離場地,我估唔單止我哋開心,歌迷一定都好開心,大家近近哋,可以跟住我哋一齊唱。有時唱大場,連歌迷個樣望落去都未必望得清楚,細場嗰種交流同感受,同大場唔一樣 ,觀眾今次都會變成我哋個騷表演其中一分子,一定會有驚喜。」Supper Moment透露今次在製作上,會有不少新構思帶給觀眾,更認為用演唱會都不足以形容這次演出,「唔好以為細場冇製作,我哋今次一樣係製作上面搞好多新野,有大型立體屏幕,有唔同視覺效果,總之今次唔可以用演唱會形容24同25號兩日的演出,這個是集光影、音樂同影像的一個沉浸式感官知覺旅程,同觀眾喺聖誕節一齊感應彼此,真係從來未有人試過。」

場地有藝術感

今次場地選址在西九自由空間演出,Supper Moment 直言因場地正,就連著名的日本音樂大師都愛這個場,「冇特別原因,個場靚仔囉!連坂本龍一都揀自由空間開騷。呢個場個氣氛好有藝術感覺,里面配套超齊全,樓底高、音響又靚,所以出來的聲音同其他場地應該有唔同感覺。不過我哋都係第一次係呢度開騷,所以感覺係點真係要唱完先知。」

  這次是Supper Moment出道以來,首度踏正在聖誕開騷,他們坦言感覺特別興奮,還計畫好帶同家人到場一起歡度,「好期待做一個又high又可以有齊溫暖回憶畀大家帶返屋企的騷。同埋會叫齊屋企人一齊睇,過一個難忘聖誕。」至於來睇騷的觀眾,Supper Moment強調一樣會有收穫,「每位入場觀眾也會收到一樣小物件,屆時在欣賞我們演出的同時,希望大家能透過內心去感應現場環境。」

不停創作新歌

2021年已接近尾聲,問到Supper Moment新一年會有何新計畫,對於有指他們有份參與由TVB與芒果TV《我是歌手》原班人馬合作的新節目《聲生不息》,他們則大賣關子,「最近不停寫新歌,有為自己又有為其他歌手寫歌,另外仲參加緊一個比賽,不過好似話唔講得住,可以講嗰陣再同大家分享。」至於2022年的新年願望,Supper Moment認為全球人類的願望都應該一樣,「希望全球疫情可以快點受控,讓大家的生活可以早日回復正常。」

視頻精選
更多新聞