陳瀅Bosco續前緣 收窩心耳塞大讚Sweet到爆!

2022年03月06日03:00
陳瀅希望藉着《飛虎3》的合作,令黃宗澤對她改觀。

【星島日報報道】

  (星島日報報道)陳瀅在《飛虎3壯志英雄》再度與黃宗澤飾演情侶,笑指當時初入行,希望令對方改觀不再「𡃁妹仔」,她更指拍槍戰戲時獲對方送上肉色耳塞保護聽覺,大讚Bosco好Sweet不會追究對方欺負他,而與吳卓羲有感情戲的姚子羚,則笑指他依然大細路。

由黃宗澤(Bosco)、吳卓羲、陳瀅、蔡思貝及姚子羚等主演的《飛虎3壯志英雄》正在熱播,三位女主角齊齊亮相《Star Talk》,陳瀅在劇中與Bosco的感情戲成為焦點,她透露入行初時已有與Bosco合作演情侶的經驗,兩人在2013年的電影《在一起》曾有感情戲,她說:「冇咩人知,嗰時仲係超級新人,我入行第二套戲就係同佢演情侶,相隔咁多年之後再同佢演情侶,感覺好唔一樣,嗰陣真係好細個、好green,行位、燈光咩都唔知,現時有咗幾年經驗,等佢唔使覺得我仲係𡃁妹仔咁!」

陳瀅自嘲肥難搵替身

陳瀅又指首次拍開槍戲,故不知道要戴耳塞自我保護,Bosco見狀即場送贈她兩個耳塞,獲陳瀅大讚好sweet:「佢準備咗啲肉色耳塞,因為冇咁易穿崩,嗰吓真係好sweet,所以平時點恰我都由佢啦!」陳瀅又指潛入豪宅一幕最辛苦,因為戲服非常性感,很多動作場口都要親自上陣,因身形問題沒有安排替身,暗踩自己肥:「我呢個身形得我自己有,通常替身都好瘦,所以唔得呀,好多動作要自己做!」

姚子羚與蔡思貝同樣與吳卓羲有感情綫,子羚繼05年《酒店風雲》再與吳卓羲合作,私下老友鬼鬼,笑指對方依然大細路:「佢都冇乜點改變,當然有成熟咗啦,但佢都係大細路,好鍾意整古造怪同萬歲請大家食飯,同佢再合作有一份默契同開心。」而思貝在劇中多次請吳卓羲食檸檬,她笑言其實有苦衷:「因為呢個女仔非常冇安全感,覺得吳卓羲個角色吊兒郎當,要經過好多考驗先覺得依賴得過,最後先接受佢。」她難忘拍攝在商場拍槍戰場口:「因為喺室內,個回音好厲害,耳仔真係嗡嗡聲,仲要個個四方八面咁開槍!」

蠔吧復業望員工有工開

另外,Bosco在尖沙嘴經營的蠔吧Oystermine,在疫情下想盡方法經營,推出外賣、平民早餐甚至西式盤菜等,至今仍未想過裁員減薪,是圈中的好老闆。該店因有員工家屬確診早前已關店消毒一星期,日前再公布停業一周至3月6日,只為保障員工健康。問到會否如期重開?Bosco回覆本報指:「餐廳會在3月7日如常營業,繼續專心做外賣幫補,但始終都要睇市面情況,防疫措施都有好多變動,接下來又有全民強檢,其實做外賣做早餐都好難幫補到生意,復工只希望員工可以有工開,其他事情疫情後再諗。」

 

視頻精選
更多新聞