伊健自揭靠睇ERROR節目減壓

2022年11月25日03:00
伊健前晚舉行第五場演唱會。

【星島日報報道】

(星島日報報道)鄭伊健現正在紅館舉行演唱會,昨午特地抽空現身支持香港血癌基金,提到在紅館舞台唱歌冧蒙嘉慧,他竟笑言「唔記得啦」,又坦言開騷要自肥,前晚他演出時講明要學ERROR的自肥精神,更多謝四子的節目為他減壓,即場向台下捧場、快將開騷的ERROR三子193、肥仔及阿Dee打氣。

伊健雖然正在舉行一連九場的演唱會,但昨日抽空出席慈善活動,他表示只是出少少力,加上活動場地鄰近紅館。演出了幾場紅館騷坦言疲累:「冇諗過攰,好開心反應非常好,要儲備能源完成最後幾場。(太太特地從日本回港支持喎!)應該啦,這幾年演唱會她都在身邊打點一切,我只做騷,其他事唔識安排。(她陪老爺睇騷。)要靠她吧。(演唱會上唱歌冧太太。)唔記得咗啦。演唱會『自肥』,Encore做自己想做嘅事。(私下有否唱歌冧太太?)私下少唱歌,打機多。(你是否浪漫的人?)不知浪漫的定義,我哋相處咁多年,唔可以用一件事來形容,總之我哋好開心。」提到樊亦敏與他相隔35年重聚,伊健指當年合作拍檸檬茶廣告相識,讚對方保養得好,好有心經常幫人。完成演唱會後,伊健笑言要打機、飲啤酒和去郊外燒烤。

肥仔阿Dee膜拜回禮

前晚伊健舉行第五場個唱,台下捧場嘉賓人氣爆燈,包括好友蔡一智、周秀娜、林德信、「頭號麵粉」Nowhere Boys主音Van、ANSONBEAN、譚旻萱、劉沛蘅,及ERROR成員何啟華(阿Dee)、郭嘉駿(193)和梁業(肥仔)等,眾多嘉賓的出現令台下一陣騷動。伊健在安歌後感謝觀眾熱情反應,並點名多謝ERROR,觀眾席上的肥仔和阿Dee立即舉手向台上的伊健膜拜,193也向伊健派心心。伊健續說:「我上一次演唱會,返去減壓就係睇你哋嘅《花姐ERROR遊》。我知道今次得兩集,所以我未睇住,多謝你哋畀我哋歡樂。仲有,我知你哋就開演唱會,我知㗎,加油啦!」三子起立向伊健鞠躬。伊健還笑言學習ERROR的「自肥精神」,挑選心水的滄海遺珠表演,娛人娛己。

為演唱會形式掙扎

ERROR將於下月開演唱會,門票昨晨10時公開發售,中午已火速售罄。而成員保錡最近搖身一變J-Rock樂隊主音,演繹Rock爆新歌《Am I Crazy?》,更邀隊友阿Dee參與Rap的部分。保錡指今次開騷將會是四子過去4年的概括總結,阿Dee也謂:「我哋儲咗好多經歷,有好多野想同大家分享,但以乜野形式,我哋仲掙扎緊,因為實在有太多方法,但我哋總係追求最完美最好效果畀大家睇到,唔想嘥咗大家辛苦撲返嚟嘅門票,然後最後攞住𠝹刀𠝹凳。」

視頻精選
更多新聞